勝瓜蜆湯

唔知戚起邊條筋，好想食蜆，咁放工去到街市睇下好唔好彩有無蜆賣先。咦！有喎，不過唔係咁靚，但係為食起上黎都唔理得咁多喇，買半斤頂下癮先啦，買多一條勝瓜 (絲瓜)，一於滾個蜆湯啦！

材料：

沙蜆　半斤

勝瓜　一條

粉絲　適量 (個人喜好啦，唔放都得)

薑　兩片 (切絲)

蔥　一細棵 (切粒)

調味：

魚露　適量

胡椒粉　適量

酒　一茶匙

做法：

1. 蜆洗乾淨後用鹽水加鐵羮浸大約半小時至一小時；

* 各人清洗方法唔同，我就會咁做：先將蜆放落 mixing bowl 度，兩隻手拿起 d 蜆，利用蜆殼互相磨擦下，沖水，再搞下 d 蜆，再沖水，之後就浸鹽水。

2. 水滾放蜆，煮到開口就熄火，夾起 d 蜆，蜆水過濾；

* 用幾多水煮蜆好？得半斤蜆咁少當然唔會用一大煲水啦，我用左一湯碗水(滿)，或水要浸過 d 蜆。

** 蜆水要過濾係因為有時會有一兩隻係沙，安全起見，絕對建議要先將蜆煮熟先，蜆水過濾後就得喇，可以咖啡過濾紙，無的話都可以廚房紙。

*** 想快 d 過濾 d 蜆水，將蜆水放置一陣，砂粒等雜質會沉澱一下，再慢慢倒出面頭 d 水，差不多倒到底部時就要過濾，咁就可以節省時間了。

3. 蜆水過濾後，加薑絲煲滾，加勝瓜件煮到差不多淋身就加粉絲，加魚露及胡椒粉調味，最後加番 d 蜆落去，水再滾就熄火，搞掂！