比番個街市我~~~

超強颱風「天兔」威力強勁，8號風球維持左14個多小時之後改發3號，無幾耐所有風球除下，lunch 外賣選擇唔多，得好少舖頭開。放工去街市買菜，得一檔。想買豆腐，豆腐檔無開；去惠康買啦，無晒，即刻去香港仔百佳，嘩！居然得番一盒，算係不幸中之大幸，咁都比我買到。唉，好憎打風，呢 d 風假我唔想要，比番個正常街市我呀~~~~~

尋晚已經想食湯羹，不過打風無煮到，呢個「海鮮豆腐羹」我覺得最緊要有蝦先好味道，其餘材料無所謂。另外「茶碗蒸」係一路都想試整，終於的起心肝試，因為煮湯羹材料都可以整茶碗蒸，於是決定一試。仲要整多個肉比老公，真係求其架咋，求其炒左個「ＸＯ醬荷蘭豆炒瘦肉蝦仁」

唔知係咪因為搵豆腐搵到傻左呢？點解咁講？頭先滿心歡喜食我個茶碗蒸，正在欣賞蒸得好滑之際，突然醒起無放鹽 T.T 淥菜心時又已經忘記左放油。天呀！浪費左一番心機.....